قصايد اخيرة / كامل الركابي
- التفاصيل
- نشر بتاريخ الخميس, 14 كانون2/يناير 2016 14:31
شعورروحك
من الكاس
تبرق
مره غيمه
ومره
ومضة
من التلاطف
والتعاطف
تزغر وتكبر
بلحظه
ومن صبح
تاكل نفسها
للنٓقِد
لتْصير
عُرضه !
الساكِن
بيت
ابعد
من طريق الماي
والساكِن
غريب
بيت
ع الحايط
شبه لون الرمل
رَسِم
جرّة ماي
مكسوره
وعلى الفخار
محفوره
بهوامش
كلمات:
لا تواسيني
عطش
مات الحبيب !
صيرورة
تتغير الأيام
تتغير الأحلام
تتغير ملامح
تعبر سنين
تتغير شموع الكوخ
من طين
تتغير دموع العاشگ
المسكين
يتغير نبض روحه
يتغير الخيط بريح
طيارة ورق خضرة
مراكب ورق
كل مركب مشى
بنوحه
ويتغير حبل مشدود
إيد
وخوف مرجوحه
تتغير ودجله الروح ،
صعدت الها
من الباطن
املوحة
تتغير مدارس حب
تتغير مناهج
تتغير مسرات ومباهج
تتغير مسارات
البدايات النهايات
الصداقات
تتغير الشامة بنهد
شامخ ع السماوات
تتغير عناوين
وبيتك راس دربونه
غده وسط الدرابين
تتغير مدارات العقل ،حرّه
غدت
مرتع مجانين
تتغير اصوات الفاخته
السمرة
وتتغير بساتين
تتغير النسمه
وتختفي البسمه
ويتغير الشاعر
ينهش بكلمه
والرسام يخجل
ما يحط اسمه
على اللوحة
الغريبة
العاندت رسمه
والمطرب
يطير اللحن من راسه
ويظل بس خيط
من نغمه
يعصر روحه ع المسرح
حزين
وياكل بلحمه
تتغير الناس
الذوق
الشعور بقيمة الآخر
الاحساس بالاخر
الإحساس بيك
بذاتك بنفسك
حتى اتحس
جمال الناس
لاتشرب بعد
صدگني : آخر كاس
ويعوز
فريقين بوسط ملعب
فريقين انت بيهم
صدگ: ياهو يفوز ؟
كبرانين
مو بس احنه
كبرانين
الكون
صار احدب
عجوز !
صفصافة
إذا آنه اريد
اكتب شعر
شْكتب ؟
عن البيت
عن نخله
عن شجره
عميقة جذر
عن النده
عن گطره ؟
آنه بْليل
اظل حد الصبح
أحسِب
عن البيت
صريفه
وماي حِب
ونخله برحي
وشجره
صفصافه
مدّت بالگصب
چفها
وغصون الها
وغدا شكل الصريفه
لا گصب هوّ
ولاشجرة
وسبحان التشابك
گال من شافه
عن سوباط
نوم الصيف
يگعد من فجر
يلگه النده بالگاع
لو جوه اصابع
رجله واردافه
كل هذا النده
وعطشان
والشرجي
حلم نهرين بشفافه!
ورد !
الى هيفاء في مشتل للورود
الحبيبه
الفينيقيه
تهدي خطوتها
الغريبه على الرمل
للشواطي
بساحل الطنطورة
اسفل حيفا
(دور )
الحبيبه
من يمر اسم
القرى المغتصبه
كل دمها
يفور
وچنت اظن
بيها قساوه
من التشرد
والتهجر والبرد
گبل ما اكتشف
لون مْن الخضار
بروحها
يشب منفرد
مدري
من يامصدر
الطاقه الخفيه
الغامضه يظل
يستمد
هذا
واحنه ابمحل
بيع ( المشتل الصيفي)
الجميل
فاجأتني بلطف
حطت راسها
على اچتافي مايل
داخت
بشوفة ورد
وانا اطمأن بالعراقي:
اشهل ترافه
مو رصاصه
هذا يمعوده ورد!
المحبة
المحبة
هي مو ثوب
اعله طولك
يرتسم
لوحة
تتشكل بعيده
عن الرسم
المحبة
مو عناوين
واسم
بيت هو الفارش
بروحك
جسم
المحبة هي
مو ايقاع
مو ضربة
طبل
نغمة تنزل
ع الگلب
من العقل
المحبة
هي مو
معرض فنون
عشگ يوصل
من وله
حد الجنون!
المحبة
من الدواخل
ماتضيع
تختصر
كل الفصول
بعمرك
بمولد ربيع !
خوف
الخوف
ساكن روحي
باني
بروحي عش
الخوف
من وحشة
غيابك
راح جاب
الليل
نام بعيني
دمعة
وضاف
لعيوني رمش
وبعد مامرت
سنه
لا
بعد مامرت
سنه
وانت بعيد
منطفي
گالوا عليك
ومنكمش
صار
رمش العين
هوّ الليل
والليل
الرمش!
استلاب
مستلَب
فاقد طباعك
لا محبه
ولا مشاعر
من زمن صار
يْتراكم
مو على احساسك غبار
وبس
على الماضي والحاضر
لاتخاف
ولا على أحبابك
تغار
بعد ماظل
شي ثمين
وماخسرته
بيت ال بروحي
رهنته
بروحي
چن تلعب اقمار
بس ورد
من عمري نابع
گبل لا تذبل ازهاره
هاك اخذ وردات
عمري
وبيعها
بْسوگ الخضار!
سلعة
تأسرك
شهوة تملِّك
حتى حاسد عيني
چي تذرف
الدمعه
انتَ انسان
وصرت
من دون تدري
الليله
سلعة!
تشابه
البارحة
انحرفت
منابع روح خضره
وضاعت
بمجرى الرمل
والرمل ماصدَّگ
بصحره
وشمس
صيفه وخريفه
بكثر
ما متشابهين
ويمكن بالخيال
مدري من ياشجره
ورقة شجر
ضاعت
مرّت بمجرى الرمل
فرّقٓت بيناتهم ،
رسمت حدود
ذاك (قصدي الصيف)
رد للماي
عطشان ولهب
والخريف
الورقة من شجرة
انتسب
اليوم
مرّت ريح
اخت النار
مرّت
نشفت الگطرات
فوگ الرمل
والورقة
اشتعل بيها اللهب
وهمّا طاحوا، ضاحكين
على الگاع ْمن التعب
متشابهين
صيف
وخريف!
كذبة
تختمر
توليفة الفكره
الفريده
براس عاشگ
من زغر
لو بالچذب
غفّت
حبيبه
وگبله
راحت للگبر
هو حاسم أمره
مايبقى وحيد
وينتحر
ماتت
وماتت الفكره
وحب جديد
بتالي عمره
وينتظر
موعد
طبيب !