ادب وفن

حزب روحي / حسين جهيد الحافظ

مع الود والتحية إلى حزبنا العظيم
الحزب الشيوعي العراقي
بمناسبة نجاح مؤتمره العاشر
حزب روحي
سلاماً يا حزب روحي
سلام العافيه
يبو الإيد النظيفه
و يبو الروح الدافيه
يا جمار گلبك ..
يبو النيه الصافيه
بيك ... بينه إشگد صبر
و إشگد أماني
بويه يا ثوب الفقير
إو فرحة المحزون
يالهمسك أغاني
إشلون ؟
شهديلك ؟
شودّي ؟
هاك إخذ روحي تهاني
يالجبت عمرك شمع للناس
وإعيونك طريق
يا صباح الخير بينه
إلكل رفيقه
إو كل رفيق
يا چبير الخلگ
وأحلامك چبيره
يا ضمير إلما نگل سوده ضميره
يطيب الهور يا شوگ الصريفه
يا نزيف الحب والمحنه إلبيك
ما بطَّل نزيفه
يا كرستال الأمل محلاك
وإمطرز قديفه
إو يا قديفه
إحزام للتعبان إنته
وإنته عالضدك قذيفه
دنيه وآمالك چثيره إو وافيه
سلاماً يا حزب روحي
سلام العافيه
هاك إخذني
إشما ردت سوّيني سوني
آنه راضي
آنه .. إموافق وحقك
حته بحروف إعتراضي
متهم كلي آنه بيدك
و إنته قاضي
إحكم إبكيفك عليه
ما أحط أبداً محامي
إو لا إستأنف هل القضيه
حكم قطعي إبلايه رجعه
إحكمني إنته
إگلادة إبداع إعله جيدك
حطني شمعه
إتضوي قاعة موتمركم
للفرح سويني گمره
إتطرز الخطوه إبدربكم
إشگد أحبكم
روحي إبحبكم صدگ متعافيه
سلاماً يا حزب روحي
سلام العافيه
يحزب حسين
حزب الوادم الطيبين
حزب الناس كل الناس
إلمشوا وإلهسه وإلآتين
فهد و محمد إو ستار
حزب كامل حزب سعدون
حزب أبو داود
رمز الافتخار
حزب عشاگ النهار
أهل طيب
إو أهل غيره
أهل إلگلوب النظيفه الصافيه
سلاماً يا حزب روحي
سلام العافيه
إثنين وإثمانين وإنتم
ذوله إنتم
أمضوي الدنيه گمركم
روحي عوذه إلموتمركم
تطرد الشر
تطرد العين الوكيحه
يللي چلمتكم صريحه
مشعل الدنيه فكركم
عاشرتكم
ألف هنيال روحي إلعاشرتكم
يللي عشرتكم .. !!
غصن ريحان إو عواطف
حيل سده
إشحده بويه العاشراكم
ينسه لو يهجر إشحده
نده إنتم روحي ورده
أمشرغده إبطيبه هواكم غافيه
سلاماً يا حزب روحي
سلام العافيه
إهدومكم ترفه إو عفيفه
إو حيل چلمتكم شريفه
الدغش من صوبكم نافض إگوامه
إنتم .. إنتم غصن زيتون إو حمامه
ليل گمريه إو أغاني
أشرد أدزلكم تهاني
روحي !!
گلبي !!
لا أدزن كل كياني
إلكم إمطرز قصيده شافيه
سلاماً يا حزب روحي إو حلمهه
يا سلام العافيه يا سلام العافيييييه