حسن سريع..! / ريسان الخزعلي

* كانَ السريعُ إسماً..

* كانَ السريعُ إقداماً..

* كانً السريعُ شهادةً.

.... وأُضيفُ وصفاً آخر..

.............،

* راكض بأسمك واسرع..؟

لو اسرع من اسمك ركضك..؟!

إنتَ الشايل بأسمك ركضك..،

وابركضك يتلامع ومضك:

نجمه إو من تزرگ ما ترجع..،

بعيونك ضميّت اللمعه، إبحد الحنطه إيفرگ نبضك

كل حبّه إتلگت بيريتك، طگت سنبل فوگ الهامه..،

واندارت فوگ إمن الهامه...، مجنونه أرضك

كل ترچيّه إتفرزن حسنك،

توميلك يل ماشي إبطولك،

لا والله ابطوله شو وأزود..،

والشذره إمن المجلس طارت..،

حطت بحزامك دلاّعه..،

يحميك أزرگهه إبهل فوته، كل جِنّ الدنيه إو ما كضّك.

ليوين..؟

إو يا وينك جنّه..،

إبوسع اعيونك شو تتراگص..،

من يگدر يلحگ وإيغمضك..؟!

* * *

صبحيه وابجدامك فزت..، ما يلحگ طارشكم يوصل..،

وإتعده الطشّار إيهلهل، غرّگنه إبطويات إزلوفه

والغيمه السوده إشما كبرت..،

نص چفّك جرهه إعله الطوفه.

يغمزلك دجله إبصوبينه، چم بوسه إمن الماي الفزّت..،

وانشتلت شامه إعله إجروحه.

كل /خيط/ إمن إذراعك رايه..،

ع المتنين إتوزّع گمره، إيضوّن للمحتار إبخوفه

ما تانيت إتوعي النايم..،

بعيونك كل نوم الدنيه إتوعّه، بيهه (إجنيجل)..،

والرمده إتكحلت بالبردي..،

والعميّه إمن أول مخطوفه.

حتّه إخيالك، وي طولك واگف متحزم..،

واثنين الشافك حسباله.

سرّتك بالبارود إمخضره..،

وإگماطك ما يلتف، خصرك مهره..،

موش أم امگمطتك گالوا..،

متگمط باسرار الفاله..، والفاله إمن أول عيّاله.

توقيعك مسماري إبسومر..،