وداعت مظفر / علي النواب
- التفاصيل
- نشر بتاريخ الأربعاء, 23 كانون1/ديسمبر 2015 20:07
باسم الحب حبيبي وداعت مظفراﮔول افراك تردلي اعزاز
صدى صوت الفراك يكلي ما اﮔدر
يل ململم ﮨﮔلبي شلون تطشر
ياكمان الله من اعزفك للكفر يغفر
علمني البدون متون يفوج اشلون حتى اعبر
اغارعليك من جرفك يانهر معذور لو تنغر
وندندن عود نخلي الماسكر يسكر
وانام اهنا مثل نوم اهل الكهف وأكثر
وانا هناك حدر في التراجي اتناك
ولوليلك وعليك ومنك اشكيلك
يولفي حجيلي واحجيلك وحك فتحت شناشيلك
جيب اهموم ذب بلوك عليه ولاتكلي انساك
اروحن وين انا بلياك واجرعه شلون سم فركاك
يخلي شبيك ظل يمي
يمشمش ضحكتي بعينك
خدر جفني اغتصب ليلك
وشعرك المجنون فززني
رﮔص خصرك طلع صوت ربابة غجر سمعني
وصعدنه بلنجة البصرة ذكرنه السوك والشطره
وتسامر جوري وي صندل كتب ذكرى بغصن شجرة
اعلة هذا الحال متعودين
والعشاق مجروحين بس حلوين
وانا وياك مختلفين
يحب الثاني ياهو اكثر
تعال وياي نرد لأول القصة ودلل علية بزود وتمخطر
احبك حيل واحلفلك
بأسم الحب حبيبي وداعت مظفر