آذار .. أجمل خبر / حسين جهيد الحافظ
- التفاصيل
- نشر بتاريخ الجمعة, 07 نيسان/أبريل 2017 12:08
مطر .. مطرخير المطر
غنه الدفو إبگلب الشجر
طگ النهر
غطه الوطن هيل إو عبر
گمريه مو گمريه
شگت ظلام الليل وإتلاله الگمر
إمن الناصريه أم الوفه
أولاية الطيبين
أولاية فهد وحسين
عشگ الملح للطين
طش الخبر
شنهو الخبر ؟
آذار إجه
شايل تباشير الفرح
شوباش عالدنيه إنتشر
الهور غنه والجبل
هيوه إو دبكات إو چوبيه
بالناصريه ... بالناصريه
حزبي رفع رايات بالناصرية
تتباهت إنجوم السمه
حيل إبفخر
نشوانه روجات البحر
زفت الفرحه هديه
بويه أحله ... بويه أخله جيه
جية فهد بآذار بويه أحله جيه
شيمة زلم
ضحكة طفل
حبات ليلو إعله النحر
آذار إجه جايب خبر
بالناصريه أم الوفه
اليوم إنولد
برعم فهد
ميلاد ترنيمة صدگ
لأهل الصدگ
نسمة فجر
شهگة صبح
بلسم يعطر كل جرح
إحزام يسند كل ظهر
ودَّن فحاتي الهور
شمام الغوه
إلطيب الجبل
ومضة أمل
يتمايل إبشوگه النخل
من همسة البلوط
بالفرحه كبر
إخيوط الشمس نزلت تبوس الگاع
محتامه الشمس
نشوة عرس
طگ الفرح كيف إو ونس
بسمة همس
آذار إجه
عشگ السنابل للحصد
شوگ الفراشه للورد
مديوفه الحنه إبوفه
إخضيره إو سِعد
حيل المعامل غردت
هلهوله للعمال لزنود الفلح
تجمة صيح
وإتسامت طيور العشگ
شمعات وإيضون صدگ
نسمة هوه إبچف مختنگ
تسيوره إلوادم بشر
بالك تدنگ رگبتك
لبعيد خل عين النظر
طش الخبر
شتلة فهد شجرة فرح
روضة عشگ
عالدنيه أتطشر صدگ
تنثر غوه
وإصبع تطگ
غيمة وفه إتكت الوفه
إبسبرة مطر
نايل إو بسته
إو أبوذيه
زماني إشما لعب وياي خله
شيوعي والشيوعي الوكت خله
تعلم من فهد ما بيه خله
شرب ماي الوفه
إمن الناصريه
غنته الوادم قصيده
أمطروه إبحب البشر
انشودة مطر
مطر .. مطر
حزبك فهد
طير السعد
تعلوله ساعات السمر
شهگة دفو
همسة غفو
إبعين السهر
للگاع من تمحل مطر
مطر .. مطر
معروفه بيه سوله المطر
للناس من ينزل فرح
طبع النهر
إيغذي النخل
والشوچ
والعاگول
وإيطگ الشجر
والدنيه تتباهه إبفخر
بيرغ حمر
بيه منجل إو چاكوچ
وآذار الگمر
آذار...
يا أجمل خبر
أجمللللللل خبر