الإعجوبة الثامنة / حارث رسمي الهيتي

ابهيدة من تمشي بلطف... يالمشيتك ما تنوصف

خصرك يدفي المستحي... وبشفافك نجوم الظهر...

شوف وغلاة السافرو... ما مرني خطار الغزل... ولامرة طاوعت القلم...

وكتبت للوادم سطر... بس انت من بيه تمر...

من تحچي يطافر ندى... والقلم لگليبي ندا... اركض وشوف المشكلة

الدنيا في حالة سكر...

من زعلت عيونك زعل... شباچ حظي ومنفتح.. لليوم گاعد ينتظر...

شفت العجيب بهيئتك... تسكت...

على شفافك تحط... كل الطيور بدنيتي... تضحك ربيع ويبتدي

تطلع فراشات الصبح... وتغازل الجوري بترف

مثلك لمن مرة بحلم... غازلت شعري وما نسى...

ذب السواد بجيتك... صار ابيض بلون الفرح...

جيتك...

اسراب من الگطا... وصوتك من بعيد الگطه...

بيديه اجفن كل جرح... عشعش بروحي بغيبتك... تنزل دموعي من الفرح

تغسل خدودي لخاطرك... وتكلك بلايه حسد

انت الاعجوبة الثامنة!!