بغداد يا أجمل مدينة / مالك القريشي
- التفاصيل
- نشر بتاريخ الأربعاء, 30 تشرين2/نوفمبر 2016 20:27
يا بغداد يا أجمل مدينه... متزوكه ودومج حزينهليش محمره بدم الشهاده
وليش أنت عاشور بسواده
وليش أنشلت سنين السعاده
والحدايق بيج ذبلانه أونينه
بغداد يا أجمل مدينه... متزوكه ودومج حزينه
شكثر مر بيج العمر شكثر مر بيج القهر
غراكانه وبعيد الجرف
والظالم بنصنه ايخسف
مكدر أوصفه بيا وصف
يمكن أوصفه أكبر خرف
وأنت يا بغداد مرفوعه بشموخ
رغم ما أنت أنينه
بغداد يا أجمل مدينه... متزوكه ودومج حزينه
يا بغداد كثرة عليج السهام
يا بغداد كثرة بيج أهل الحرام
المـاعدهم ضمير موشلينه
ما بيهم الواحد أمين
مر بيج الفرح بس أربع سنين
راح كل ذاك الفرح راحت سنينه
بغداد يا أجمل مدينه ... متزوكه ودومج حزينه
ليش يا بغداد أدموعج تسيل
وليش حكامج على الوادم تعيل
وليش أنت دومج بالألم
من داعش وأهل الظلم
تبقين يحنينه بسكم ؟
كافي ملينه الفساد
تمرضت كل العباد
يصير الله قابل بيهم علينه
بغداد يا أجمل مدينه ... متزوكه ودومج حزينه
يا بغداد يا أم العلم
يا بغداد يا أم السلم
يا بغداد يا أم الحضاره
أنريد من عندج بشاره
نريد ما يبقه ابد منهم أثر
ولا حته الوصي ولا تبقه وزاره
شرارة هل شعب تبقه شراره
شراره تشع علينه تضوي بينه
بغداد يا أجمل مدينه ... متزوكه ودومج حزينه
يا بغداد يم دجله عينج دمعج تهمله على طفالج الحلويين
أنطفت شمعتهم بساع طفوهه ذوله الضباع
كتلوهم شمورة يزيد عاشوا وظلوا عبيد
وجماله جونه الراكعين بسم الدين فرهدونه وبايكينه
بغداد يا أجمل مدينه ... متزوكه ودومج حزينه
بغداد يا أم الشعر يم الدواوين
بغداد يا حلوة الحلوين
شمالج غيبتج طالت أمج جابتج حالت
بغداد يم تموز الحمر بغداد يم سيف الموشر
شمالج ما تعودين لحبابج الطيبين
يبغداد البنفسج طينتج طينه
بغداد يا أجمل مدينه... متزوكه ودومج حزينه