قصيدتان بمناسبة ثورة ثورة 14 تموز المجيدة / حسين جهيد الحافظ
- التفاصيل
- نشر بتاريخ الخميس, 09 تموز/يوليو 2015 18:42
1— 14 تمّوزما بين ومضة أمل
وبين الحزن خنياب
وي غبشه لن الفرح
اِچفوف وتدگ عالباب
اِتدله سعف النخل
للگاع شال اِتراب
طشّاه كحلة عرس
عاشرت جفن أحباب
واِعيون لو سلهمت
ليهه اليصد يرتاب
صاحت اِتراب الوطن
ما يحب جدم أجناب
صاحت وصاح الصدى
والصدى چان اِعتاب
اِمن الليل بزغ فجر
شگ ظلمة السرداب
الوطن جنة عدن
روضه وهواهه أطياب
و (أشرقت شمس الضحى)
وليه عادت الغيّاب
لافته اِبباب الوطن
والخط حلو جذّاب
رد يمّه يالمبتعد تره
اِشما چانت الأسباب
يمّه وحگ غربتك
يا خيرة الأنجاب
گلبي محنه إلك
وإنته النسيم الهاب
يا وفه كلك وفه
وليك الوفه جلجاب
اِعيوني الخطوتك ضوه
ودمعي اليكت سجّاب
ماي ونده الوردتك
من تستجير اِبآب
يصعد وينزل مطر
ماي المطر جلاّب
إبتموز وإنته المطر
مايك يكت جلاّب
لاااااااازم يكت جلااااااااب
2- إكحيلة تموز
تموز // 1999
جبتهه إمرسنه إو خيّالهه خيّال
توج الگاع من تجدح حوافرهه
تلگاهه الوطن .. والناس
فرحة عيد شالتهه إبضمايرهه
مفروشه الدروب إگلوب
إلهه إو حب تناطرهه
الوطن صار الوطن بيرغ
مرسوم إبنواظرهه
أكحيله إيرتل المهذاب
ضمير الناس كل الناس ناصرهه
حچينه ويّاك گلنالك
أصيله إو بالأصايل شوگ
تعشگ من يسامرهه
تهدهه ليش للماگض رسن فد يوم
بيده إيحل ظفايرهه
كرم لو غلطه لو باگوك
غفله وإنته شاطرهه
يشاطر غلطتك غلطه
غاضت حته غافرهه
إنجرح منه الوطن
گاع إو ماي
مسارحهه إو منابرهه
جزاك اللوم أبو الكلفات
شنگلك يظافرهه
إغلطت معذور طيبه أوياك
بس إعداك ما تعرف تره الطيبه
ردي إو ماكر
زنيم إو فاسد إو محتال طيبهم
أبد مو طاهر إحليبه
متعود على الموزين طبعه
إو همه بس جيبه
الوطن عنده الوطن
لو خانه شربة ماي
ما يعنيه ترتيبه
ما يعنيه ترتيبه