النهر الثالث / حسين جهيد الحافظ
- التفاصيل
- نشر بتاريخ الأحد, 03 نيسان/أبريل 2016 20:15
مو دوم إبحزن لو طاحن النجماتمرات إبفرح من تسگط الدمعه
عينك عالسمه وإتناوش النجمات
يالليلك طويل اشتنفع الشمعه
شد إبزود حيلك حيل
لاوي الليل
إصعد للگمر وي فزعة الفزعه
حط دم الشهيد الدرب وأمشي إعليه
ذاك المات واگف ما خذل ربعه
مد ضلعه جسر للوادم إيعبرون
عزمه ما وهن عزمه ...
لحظه. إو لا رجف ضلعه
وَج إسنين عمره إشموع
لعيون الوطن ما گال :
أسف تعبن إشموعي
شيوعي !!
يا كفو إو نعمين لو گالوا شيوعي
شايع كالبدر وأكثر شيوعي
إليضدني إشفهم من أفكاري شيوعي
أباهي الكون چي لني شيوعي
وأعلّي أويه النجم فوگ الثريَّه
أغني للنخل للماي
لشفاف الهوه بأحلام ورديه
تسولف للنده الولهان حنيه
أچفوفي بيض
حب الناس طبعي إو طرز أوراقي
عراقي !!!
أديم الأرض من شيمة عراقي
هذوله إحنه الگمر منه زهه إو نوَر
( زلم تشرين حدر البردي نتنطر )
نشامه إو للوكت قاده
( وإحنه دربنه معروف يا بو علي
والوفه عدنه عاده )
زلم تتلاوه وي الموت تصميم وإراده
رضعنه من ثدي أم الطيب
كل الطيب
من گاع العراق السمره ولاده
حنان أو شوگ
غيره أو طيب
مثل للناس عشرتنه
عشگ محبوب أو حبيب
كبرنه إسنين
من رحم الشعب من ناسنه الطيبين
من فرحة طفل بالعيد
من شهگة البرحي
إو لهفة إمحبين
على احبال المشانق
فوگ چتف الموت
صحنه إبصوت
شنهو الموت .. فنه الموت
ما يگدر شحده إيفوت
إيصير الموت ميت وإحنه التابوت
نغنيله لحن بيات
فرحه والشعب غنّه
(حزبنه سالم حزبنه
ما همته الصدمات سالم حزبنه )
"مقتطفات"