ها... يالماشي هذا الليل وحدك / رياض النعماني
- التفاصيل
- نشر بتاريخ الأربعاء, 28 تشرين1/أكتوير 2015 20:53
غَصْبَنْ على الكون نِعْدِلها،وترد تضحك لأهلها
وإحنا أهلها،
وهي رايات
وغناني
وشوگ، وإمحبه
وربيع، وگمره وإليالي عرس
برگة بريج... وماخذ الدنيا يضويها غوى بگصة
فرس
زهوة عراضه، والبرانو إمهلههات إزلوف، فوك
چتوف تضحك للشمس
هيبة چباشه، إتزفها للهور البنادق
والزلم،
والعمد والرايات.. فجر اللي يجي بالليل، گبل الليل
ويساهر،
على ظهور الجواميس النجم جسر اليوصل أطراف بالأطراف
ويضوي، وضواه إيضوي ع الصوبين،
ع الصوبين ملتمين عباره،
وزلم
وجروف وإخيول، وگمر ترهف
"لأبن شمسي"(1).. اليصيح، وصوته المجرَّح
يوسع الهور،
وإيموَّج الماي اليضرب بتالي الجرف، ويرد
إيدور،
إشما يجينا الليل يا (رحمن)(2)
گمريه أنتَ فوك الهور
ما چان الدهر مره أويه گلبك،
لا صفه،
اولا دار يمك يوم
نهر (البدعه) يعرف بيه
يا ما وصل الثوار لبيوت الوره (الجزره)(3)
التساهر ويّه ظلمتها مسچ واعراس
ها... يالماشي هذا الليل وحدك،
وأنتَ گلبك گلب هذي الگاع... لم الناس كل الناس،
ويّه الموت تمشي، وأنتَ مطرب للخطر، نشوان كلش
للشدايد،.. صارت إتمرجح تراچي الگاع تتمرجح الخطواتك
يبو ضحكه التجيب العيد لبيوت المحبين.. ومحب أنتَ
ونحبك، والمحبه إتحبك.. إتحب اليحب وأنتَ تحب تراب گاعك..،
گلبك إعلى الگاع... تسمع شوگها
ولهفتها
وهروش البعدها اللسَّه ما صارت
وخضرت،
تسمع اللي راح من ايام.. تسمع
تسمع اللي جاي من ايام... تسمع
يا عمد...
توگف عليه گبة السمه
يابوي
چم زلزال ما هدَّك
التحضنه الگاع شيهدّه؟
اشكثر،
چم شدّه مرت بيك چم شدّه
وتجي شدّه
وره شدّه
بعد شدّه
وأنت وسط الگلب تضحك
هوى وورده،
تگول الناس:
من إنسولف بذكره، وطواريه تصير إرواحنا
گمره،
ومسچ
وگلوبنا إشواطي، وگلب سعده
نلملم فجر من بابك
تجينا إزلام من إبعيد متغتره بضباب إثگيل
بمشاحيف ثگلت من عزمها، والرصاص
إثگيل... يا طاري العشك بالروح
يگولولك:
إجينا لك..
بنادقنا تسوي الليل ردسه إبابك المهيوب
نتحنَّه، ونحنَّيه، ونحنَّي الليل
هور أهلك يعرفك،
ما يبدلك بالذهب كله
هور الله.. يعرف أهله
يعرف السهروا، وماتوا فرح لأهله
يگولولك... زمانك جاي
لا.. ميموت عرك إندفن جوّه الگاع
يوم، وهم يخضّر،
گاعنا دهله
فراتك حلو.. ومي دجله
بعدها الخيل،
وإزلام التزين من تمشي..، ولو حزن العليهه إطويل
يبو بخته اليعثر العايل إمن إيعيل
يانوماس... يا خبزه التعافي العلّه والخلّه
يگول الليل:
يوم المايمر إستاحش، وتستاحش الوحشات
ما تضحك سمه النجمات
حزنك.. لو يعرفونه.. دوه للروح
أجيال التجيك إمحزمه، تمشي وراها أجيال
ميموت الجذر لو مات
ورا گاع
وسواجي
وعمر
وأشجار
وإزلام، وإمكابر، وعز وعافيه
وطيبات
إتشح دنياك،
وأنتَ بعرك گصتك تعجن تراب الوفه، وتخبز
خبز للناس
بس بطيب ذكرك أطرد الوحشات
يا بويه.. أشكثر حبيت
يا بويه، أشكثر محبوب
يا بويه إشكثر حلوات كلماتك زراك إيسِّهر
النجمات
بعدها ايام عزّك تمشي بالأيام
مواكب،
والرگاب شموع للاعدام
مواكب، والزلام إشموع طشينا لها إملبس وجوري
وواهليه،.. وأنتَ بالاحلام طرزت
وزهيت
وما طفيت
اولا حنيت الهام
واللي گضه عمره أوياك يرسملك مذابح سوده
شفت إشلون نبشوه
وذروه
وضاع
كل ذيج الليالي.. الگاع چانت تصرخ وتلهج:
إطردوا المزبله من إترابي
خنگتني روايح جيفته الزفرة
وإنتْ.. بعد المذابح كلها ذاك انت تجي نهرين بيض
وسفن بيضه
والزمان الجايبك ابيض
حلو فجره
على الصوبين ذيچ بيوتنا مفتوحه الشبابيچ
مضويه، ووسيعه ودافيه وخضره
عرس،
وبكل كتر
من كل كتر نسمع اغاني بليلة الگمره
وعلى الصوبين إلك صوبين،
وگلوب، وهوى إمحبين
" ستار شدة ورد (4)
محمد بيابي العين
جرح العليهم جرح.. نيشانه بيَّ إسنين"
ميموت..
اليصير إسمه
وزمانه، وذكره بالدنيا اغاني
ذكره يحيي الموت
ــــــــــــــــــــــــــــــ
(1) (2) المقصود المناضل والمغني الكبير عبد الرحمن شمسي.
(3) الجزرة منطقة في ريف الحي كان يلجىء اليها المناضلون الشيوعيون.
(4) اغنية شهيرة لحنها الفنان المعروف طارق الشبلي، وهي تمجد الشهيدين ستار خضير، ومحمد الخضري.